أفضل طباعة بجميع الألوان بالروتو من شركة مهندس منسي

أفضل طباعة بجميع الألوان بالروتو من شركة مهندس منسي

المهندس منسي: السلام عليكم.

العميل: وعليكم السلام، معلش يا باشمهندس أصل صوتك اختفى كدا فجأة.

المهندس منسي: ولا يهمك يا غالي.

العميل: آه، بقولك لحضرتك إيه البيانات.. آه.. طب انت بتطبعها؟، يعني جسم المنتج بتاعه بتطبعها؟

المهندس منسي: آه عندنا

العميل: طيب، إيه اللي بتحتاجه مني؟، أنا هديك مثلا في دول، أنا عندي مثلاً هتحتاج العرض بتاع البكرة؟

المهندس منسي: محتاج التصميم كله.

العميل: التصميم، وبعد كدا التصميم بقى هيحددلك عرض البكرة.

المهندس منسي: كل حاجة آه.

العميل: آه.. تمام طيب، دا بيتباع إيه؟ بالكيلو؟ والألومنيوم كدا؟

المهندس منسي: آه.

العميل: طيب بيعمل كام سعر الكيلو في التغليف؟

المهندس منسي: لو من غير طباعة بـ 18.

العميل: 18 جنيه للكيلو، والطباعة؟ 4 لون؟

المهندس منسي: دا بقى بنحدد الطباعة ونبص عالطباعة، والعرض والكمية، ونبدأ بقى نقولك هيبقى كذا.

العميل: أنا بقى بعمل الطباعة بنتون، اللون بنتون4 لون.

المهندس منسي: مفيش حاجة اسمها..، إحنا بنطبع روتو، إحنا بنطبع روتوجرافيك أحدث أنواع الطباعة وأفضل أنواع الطباعة.

العميل: آه تمام، يعني دي قد إيه بالتقريب؟

المهندس منسي: لا مينفعش، مينفعش أقولك سعر، أقولك أي سعر وبس؟ مهو مينفعش، لازم أشوف الـ..

العميل: طيب في تفاصيل عندك منيمم أوردر؟

المهندس منسي: المنيمم أوردر ربع طن، ولازم أشوف التصميم، وأشوف كل الـبيانات حبدأ أقول حيبقى كذا، إنما سعر، حيبقى سعر أي كلام في أي كلام سريع…

العميل: آه.. لا ما أنا هقولك ده عشان صنف جديد، أنا شغال لسه مع التسعير مع الصحة مع كذا حاجة، بحسب دراسات الجدوى ليه..

المهندس منسي: انت تبعتلي الديزاين بقى، وتبعتلي الكمية، هقولك سعرها يبقى كذا.

العميل: أنا الكمية حسب الأوردر بتاعك، انت قايلي أقل كمية عندك هي ربع طن

المهندس منسي: آه ربع طن آه.

العميل: ومطبوع طبعاً دا بالكيلو.

المهندس منسي: آه نشوف بقى الديزاين، ونشوف الدنيا فيها إيه، ومتقلقش خالص، إبعتلي عالإيميل حاجتك.

العميل: طيب بالنسبة للكمية الحاجات اللي أنا قولتهالك دي، 50 جرام للورق، و15 للبولي إيثيلين، وألمونيوم 12 ميكروم، والبولي إيثيلين الطبقة الداخلية خالص 35 ميكروم، دا موجود نفس المواصفات دي بالظبط عندك؟ 4 طبقة؟

المهندس منسي: ثانية واحدة يا دكتور.. معاك يا باشا.

العميل: آه، الـ 4 طبقة دا موجود عندكم، بنفس المواصفات اللي أنا بقولك عليها دي؟

المهندس منسي: إن شاء الله

العميل: طيب مقدرش آخد منك فيها عرض سعر كدا ولا فيها حتى من غير فصال …

المهندس منسي: لا إحنا كدا بنلف حوالين بعض في نقطة واحدة، يعني أنا بقول لحضرتك ابعتلي الكمية، وابعتلي الديزاين، هبعتلك ..

العميل: معنديش.. أنا معنديش أي بيانات خالص، يعني بالنسبة للـ..

المهندس منسي: مهو سمي أي حاجة..

العميل: عشان كدا أنا بكلمك أقولك انت إيه طلباتك، انت عايز كمية

المهندس منسي: ثانية واحدة يا دكتور..

العميل: انت بتحتاج كمية، وبتحتاج تصميم عشان تديني الـ..

المهندس منسي: آه معاك يا باشا.

العميل: تصميم وإن أنا أحدد كمية بالكيلو مثلاً عشان تقدر تديني

المهندس منسي: آه ماشي

العميل: ماشي يافندم، أنا متشكر ومبسوط إني إتعرفت على حضرتك.

المهندس منسي: الله يباركلك أنا أسعد.

العميل: شكرا ليك، سلام